"MƏDƏN SƏNAYESİNDƏ ŞƏFFAFLIĞIN ARTIRILMASI"
Koalisiyası haqqında

ƏSASNAMƏ

13 may 2004-cü il

1. Koalisiyanın məqsədləri
   Koalisiyanın məqsədləri aşağıdakılardır:
   • Təbii sərvətlərin istismarından əldə olunan və Azərbaycanın payına düşən gəlirlərin tam həcmdə dövlətə çatması, onların etibarlı saxlanması və səmərəli istifadəsinə ictimai nəzarətin təşkili və həyata keçirilməsi;
   • Təbii sərvətlərin istismarı və əldə olunan gəlirlər barədə Azərbaycan vətəndaşlarının məqbul səviyyədə məlumatlandırılması üçün müvafiq tədbirlərin həyata keçirilməsi və o cümlədən dövlət orqanları və şirkətlərin bu sahədə fəaliyyətinə ictimai nəzarətin təşkili və həyata keçirilməsi;
   • vətəndaş cəmiyyəti institutlarının şəffaflıqla bağlı səylərinin birgə fəaliyyət formasına keçirilməsi və onların sayəsində ictimai fəallığın yüksəldilməsi;
   • Böyük Britaniya hökumətinin elan etdiyi və Azərbaycan hökumətinin qoşulduğu “Mədən sənayesində şəffaflıq təşəbbüsü”ndə Azərbaycan ictimai qurumlarının təmsil edilməsi.
   
   
   
2. Koalisiyanın iştirakçıları
   • Koalisiya iştirakçısı istənilən qeyri-hökumət qurumları və ayrı-ayrı ictimai xadimlər və mütəxəssislər ola bilər.
   • Koalisiyaya üzv olmaq istəyən hüquqi və ya fiziki şəxs bu Əsasnamənin müddəaları ilə razı olmalı və müvafiq ərizə ilə Koalisiyanın rəhbər orqanına müraciət etməlidir.
   • Koalisiyaya üzvlük könüllüdür.
   • Koalisiyaya yeni üzvlər Koalisiya üzvlərinin ən azı 2/3-nin razılığı əsasında qəbul edilir.
   • Koalisiyaya üzvlük istənilən anda üzv tərəfindən dayandırıla bilər.
   
   
   
3. Koalisiyanın hüquqi statusu
   Koalisiya hüquqi şəxs deyildir.
   
   
4. Koalisiyanın fəaliyyət formaları:
   • konfrans, seminar və dəyirmi masaların keçirilməsi (o cümlədən virtual);
   • işçi qrupların və komissiyaların yaradılması;
   • bu və ya digər problemlə əlaqədar müvafiq auditlərin və mütəxəssislərin ekspertizasının təşkili;
   • dövlət orqanları, yerli və beynəlxalq qurumlar, təşkilatlar və şirkətlərlə danışıqların aparılması və əməkdaşlığın qurulması;
   • qanunvericiliyin təkmilləşdirilməsi üzrə işçi qrupların yaradılması. Müvafiq təkliflərin Milli Məclisdə qəbul olunmasına lazımi səylərin göstərilməsi;
   • xüsusi ictimai aksiyaların (piketlər, yürüşlər, mitinqlər, ictimai teatr tamaşaları, "korrupsiyasız bir gün", əlaqələndirilmiş yazıların KİV-də nəşri, fotosərgilər, karikatura sərgiləri və b.) keçirilməsi;
   • kitabların, kitabçaların, bülletenlərin, plakatların və b. nəşri;
   • xüsusi vebsaytın yaradılması;
   • xarici təcrübənin öyrənilməsi və yayılması;
   • beynəlxalq səviyyədə Mədən Sənayesində Şəffaflıq Təşəbbüsündə iştirak;
   • fəallar üçün treninqlər;
   • vətəndaşlara məsləhətlər;
   • qanunvericiliklə qadağan edilməmiş digər fəaliyyət formaları.
   
   
   
5. Koalisiya üzvlərinin hüquqları
   Koalisiya üzvünün aşağıdakı hüquqları var:
   • Koalisiyanın iclaslarında iştirak etmək;
   • Koalisiyanın rəhbər orqanlarını seçmək;
   • Koalisiyanın məlumat bazalarından istifadə etmək;
   • Koalisiya şurasının fəaliyyəti barədə məlumat tələb etmək;
   • Koalisiyanın fəaliyyət sahəsinə aid bu və ya digər məsələlərin Koalisiyanın iclaslarında baxılması üzrə təkliflər irəli sürmək.
   Koalisiya üzvünün Koalisiyanın adından hər hansı bəyanat vermək hüququ yoxdur.
   
   
6. Koalisiya üzvlərinin vəzifələri
   Koalisiya üzvü bu Əsasnaməni rəhbər tutmalıdır.
7. Koalisiyanın idarəetmə orqanları
   Koalisiyanın ali rəhbər orqanı onun üzvlərinin ümumi yığıncağıdır.
   Ümumi yığıncaq ən azı yarım ildə bir dəfə keçirilir. Novbədənkənar Ümumi yığıncaq Koalisiya üzvlərinin ən azı 1/3-nin tələbi ilə çağırıla bilər. Növbədənkənar Ümumi yığıncaq 2 Şura üzvünün tələbi ilə də çağırıla bilər.
   Ümumi yığıncaqlararası dövrlərdə Koalisiyanın rəhbər orqanı Ümumi yığıncaq tərəfindən seçilmiş Şuradır.
   Şuranın ilk tərkibi 7 nəfərdən ibarət seçilir. Sonrakı dövrlərdə Ümumi yığıncağın qərarı ilə Şura üzvlərinin sayı artırıla bilər.
   İlk Şura yarım il müddətinə seçilir. İkinci şura 1 illik müddətə, sonrakılar isə 2 illik müddətə seçilir.
   Şura Koalisiyanın fəaliyyətini qurur, tədbirlərə rəhbərlik edir, yerli və xarici təşkilatlar və qurumlarla danışıqlar aparır və Koalisiyanın adından müvafiq sənədlərin imzalanmasına razılıq verir.
   Şuranın işini təşkil etmək üçün Şura üzvlərindən birini Əlaqələndirici seçir.
   Şuranın fəaliyyətini əks etdirən məlumat Koalisiyanın aylıq bülletenlərində təsvir edilir və Koalisiyanın bütün üzvlərinə çatdırılır. Eyni ilə məlumatlar koalisiyanın vebsaytında da yerləşdirilir.
   Şura Əlaqələndiricisinin səlahiyyətləri Şura tərəfindən müəyyənləşdirilir.
   
   
8. Koalisiya fəaliyyətinin maliyyələşdirilməsi
   Koalisiyanın fəaliyyəti qrantlar, eləcə də Koalisiya üzvlərinin maliyyə vəsaitləri hesabına maliyyələşdirilir.
   
   
9. Bu Əsasnaməyə dəyişiklik edilməsi qaydaları
   Bu Əsasnaməyə dəyişiklik Koalisiya üzvlərinin ən azı 2/3-nin razılığı əsasında edilir.
10. Koalisiyanın ləğv edilməsi
    Koalisiya onun üzvlərinin ən azı 2/3-nin razılığı əsasında ləğv edilir.